Hjálmar dáðadrengur

Það er nú ekkert lítið að gerast hjá honum Hjálmari núna. Fékk tvær tönnslur og byrjaði að klappa þegar við vorum á Íslandi. Er svo núna farinn að sýna hvað hann er stór og skríður um allt eins og elding... á maganum! Nýjasta nýtt er svo að hann var að standa upp við sófaborðið bara rétt í þessu.

Það má ekki líta af honum ef maður vill ekki missa af neinu :)

Stiklað á stóru

Þá erum við loksins lent í Köben. Fríið búið að vera alveg stórkostlegt. Marielyst á Falster hér í Danmörku, geðveikt veður, frábær matur í góðra vina hópi. Stutt stopp í Luxembourg. Montelimar í Frakklandi, fínasta hús með æðislegri og nauðsynlegri sundlaug í steikjandi hitanum. Þar áfram lítið gert annað en að borða og spila Sequence á meðan krakkarnir léku sér eins og englar ;) Svo aftur stutt stopp í Luxembourg hjá Silju og Árna í áframhaldandi afslappelsi. Utrecht í Hollandi að heimsækja Valtý og Eddu og svo heim í nokkra daga að ná áttum áður en haldið var til Íslands í brjálæðið!

Selma systir giftist honum Paul sínum á Íslandi og það var alveg frábær dagur í alla staði. Skemmtileg athöfn, gott veður, góður matur, skemmtilegar ræður og frábærir taktar á dansgólfinu hjá öllum og sérstaklega móðursystrum mínum :) Ég lifi lengi á þessu.
Selma var svo auðvitað alveg gullfalleg brúður og bráðum koma myndir af því hér á síðuna svo allir geti dáðst að henni :D
Að lokum áttum við svo að fara í brúðkaup vestur í Bolungarvík en Sigtryggur þurfti að fara einn þar sem Hjálmar fékk svo háan hita í langan tíma að ég treysti mér ekki til að fara frá honum hvað þá leggja það á einhvern annan að passa svona lítið veikt barn og foreldrarnir þetta langt í burtu - en svona er lífið. Hjálmar er allavega orðinn stálsleginn núna okkur til mikillar ánægju og gleði því hann er náttúrulega bara algert nammi.

Núna erum við svo bara nýlent í Danmörku og strax búin að fækka fötum og opna alla glugga til að reyna að vinna á móti þessum hita.

Spurning hvort við þurfum að fara að hlaupa hér i kringum söen útaf öllu þessu áti...

Eftir þetta frábæra frí þurfum við að fara að vinna í því að Nína Berglind átti sig á því að þetta er ekki alltaf svona á Íslandi. Það eru ekki alltaf allir í fríi og tilbúnir að fara útum allar trissur með hana og leika við hana endalaust og svo framvegis. Sjáum til hvernig verður í leikskólanum á morgun. Hún hefur auðvitað frá mörgu að segja þó það tróni auðvitað á toppnum að hún er ".. tannlaus greyið" eins og hún orðar það sjálf. Stóra stúlkan okkar missti fyrstu tönnina sína 3. ágúst og er orðin fullorðin :) Við sátum og vorum að spila finna pör og hún fer að tala um að amma Nína sé alltaf að svindla í þessu spili sem er ekki alveg satt því hún er alltaf að svindla og ég segi það við hana og þá stendur hún upp, setur hendur á mjaðmir og segir "Nehei, ekki eftir að ég missti tönn!!"